Verse 1: UJakobe, inceku kaNkulunkulu neyeNkosi uJesu Kristu, uyakhonza kuzo izizwe eziyishumi nambili ezihlakazekileyo.
Verse 2: Bazalwane bami, nxa nehlelwa yizilingo ngezilingo, anothi kungukuthokoza kodwa,
Verse 3: nazi ukuthi ukuvivinywa kokukholwa kwenu kuveza ukukhuthazela.
Verse 4: Kepha ukukhuthazela makube nomsebenzi opheleleyo, ukuze nibe ngabapheleleyo nabangenacala abangasweli lutho.
Verse 5: Uma-ke kukhona kini oswela ukuhlakanipha, makacele kuNkulunkulu obapha bonke ngobuhle engajakadi, khona uyakuphiwa.
Verse 6: Kepha makacele ngokukholwa engangabazi ngalutho; ngokuba ongabazayo unjengedlambi lolwandle eliqhutshwa, ligujiswa ngumoya.
Verse 7: Ngakho makangasho lowo muntu ukuthi uyakwamukeliswa utho yiNkosi,
Verse 8: umuntu onhliziyombili oguquguqukayo ezindleleni zakhe zonke.
Verse 9: Umzalwane ophansi makazincome ngokuphakama kwakhe,
Verse 10: kepha oyisicebi makazincome ngobuphansi bakhe, ngokuba njengembali yotshani uyakudlula.
Verse 11: Ngokuba ilanga liphuma libalele, libunisa utshani, imbali yabo iwele phansi, nobuhle besimo sabo bunyamalale; kanjalo nesicebi siyakudlula ezindleleni zaso.
Verse 12: Ubusisiwe umuntu okhuthazela ekulingweni; ngokuba esevivinyekile uyakwamukeliswa umqhele wokuphila othenjisiwe yiNkosi kwabayithandayo.
Verse 13: Umuntu oyengwayo makangasho ukuthi: “Ngiyengwa nguNkulunkulu,” ngokuba uNkulunkulu angeyengwe ngokubi, naye uqobo akayengi muntu.
Verse 14: Kepha yilowo nalowo uyengwa ehuhwa ngezakhe izinkanuko, ehungwa;
Verse 15: uma inkanuko isithathile, ibeletha isono; nesono sesiphelelisiwe, sizala ukufa.
Verse 16: Ningadukiswa, bazalwane bami abathandekayo.
Verse 17: Izipho zonke ezinhle neziphiwo zonke ezipheleleyo zivela phezulu, zehla kuYise wokukhanya okungekho kuye ukuguquka nasithunzi sokuphenduka.
Verse 18: Ngokuthanda kwakhe wasizala ngezwi leqiniso, ukuze sibe ngabokuqala bezidalwa zakhe.
Verse 19: Niyakwazi lokho, bazalwane bami abathandekayo. Yilowo nalowo muntu makasheshe ukuzwa, aphuze ukukhuluma, aphuze ukuthukuthela;
Verse 20: ngokuba ulaka lomuntu alusebenzi ukulunga kukaNkulunkulu.
Verse 21: Ngakho lahlani yonke insila nokubi okuvamileyo, namukele ngomoya omnene izwi elitshaliweyo elinamandla okusindisa imiphefumulo yenu.
Verse 22: Yibani ngabalenzayo izwi, ningabi ngabalizwayo kuphela, nizikhohlisa.
Verse 23: Ngokuba uma umuntu engolizwayo izwi engesiye olenzayo, lowo ufana nomuntu obuka ubuso bakhe bemvelo esibukweni;
Verse 24: ngokuba uyazibuka, amuke, akhohlwe masinyane ukuthi wayengonjani.
Verse 25: Kepha obukisisa emthethweni opheleleyo wenkululeko nohlala kuwo, engesiye ozwayo nje akhohlwe, kodwa engowenzayo asebenze, lowo uzakuba ngobusisiweyo ekwenzeni kwakhe.
Verse 26: Uma umuntu esho ukuthi uyikholwa, engabophi ulimi lwakhe kungathi ngetomu kodwa ekhohlisa inhliziyo yakhe, ukukhonza kwalowo kuyize.
Verse 27: Ukukhonza okumhlophe okungenabala phambi kukaNkulunkulu uBaba yilokhu ukuhambela izintandane nabafelokazi osizini lwabo nokuzigcina kungabi yicala lokwezwe.