1 Thessalonians - Chapter 5

Verse 1: Kepha ngezikhathi nangemizuzu, bazalwane, anisweli ukulotshelwa,

Verse 2: ngokuba nina uqobo niyazi kahle ukuthi usuku lweNkosi luza njengesela ebusuku.

Verse 3: Nxa bethi: “Ngukuthula nokuhlala kahle,” khona ukubhujiswa kuyabazuma njengemihelo ifikela okhulelweyo, abasoze baphunyuka.

Verse 4: Kepha nina bazalwane anikho ebumnyameni, ukuze lolo suku lunifice njengesela,

Verse 5: ngokuba nina nonke ningabantwana bokukhanya, ningabantwana bemini. Asisibo abobusuku noma abobumnyama;

Verse 6: ngalokho-ke masingalali njengabanye, kodwa masiqwashe, siqonde.

Verse 7: Ngokuba abalalayo balala ebusuku, nabadakwayo badakwa ebusuku;

Verse 8: kepha thina esingabemini masiqonde, sifake isivikelo sesifuba sokukholwa nesothando, isigqoko sibe yithemba lokusindiswa;

Verse 9: ngokuba uNkulunkulu kasimiselanga ulaka kepha ukuba sizuze ukusindiswa ngeNkosi yethu uJesu Kristu

Verse 10: owasifelayo ukuba, noma siqwashile noma silele, siphile kanye naye.

Verse 11: Ngalokho-ke vuselelanani, nakhane njengokuba futhi nikwenza.

Verse 12: Kepha siyanincenga, bazalwane, ukuba nibazi abakhandlekayo phakathi kwenu, nabaniphetheyo eNkosini, nabanilulekayo,

Verse 13: nibazisise kakhulu othandweni ngenxa yomsebenzi wabo. Hlalisanani ngokuthula.

Verse 14: Kepha siyaniyala, bazalwane, ukuba niluleke abangahambi ngomthetho, nithokozise abadanileyo, nisekele ababuthakathaka, nibabekezelele bonke.

Verse 15: Qaphelani ukuba kungabikho ophindisela omunye okubi ngokubi; kepha jongani njalo ukwenza okuhle, omunye komunye nakubo bonke.

Verse 16: Thokozani njalo;

Verse 17: khulekani ningaphezi;

Verse 18: kukho konke bongani; ngokuba lokhu kuyintando kaNkulunkulu kuKristu Jesu ngani.

Verse 19: Ningamcimi uMoya;

Verse 20: ningakudeleli ukuprofetha;

Verse 21: vivinyani konke, nibambisise okuhle;

Verse 22: dedani kukho konke okubonakala kukubi.

Verse 23: Kepha uNkulunkulu wokuthula, yena uqobo, makaningcwelise ngokupheleleyo, kulondolozwe umoya wenu wonke nomphefumulo nomzimba, kungabi nacala ekufikeni kweNkosi yethu uJesu Kristu.

Verse 24: Uthembekile yena onibizayo, oyakukwenza futhi.

Verse 25: Bazalwane, sikhulekeleni.

Verse 26: Khonzani kubazalwane bonke ngokwanga okungcwele.

Verse 27: Ngiyanifungisa iNkosi ukuba le ncwadi ifundwe kubo bonke abazalwane.

Verse 28: Umusa weNkosi yethu uJesu Kristu mawube nani.