Verse 1: Isilinganiso esikhohlisayo siyisinengiso kuJehova, kepha isisindo esiyiso siyintokozo yakhe.
Verse 2: Lapho kufika ukuziqhenya, kufika nehlazo; kepha kwabathobekileyo kukhona ukuhlakanipha.
Verse 3: Ukuphelela kwabaqotho kuyabahola, kepha ukuphambanisa kwabambuluzayo kuyabachitha.
Verse 4: Ingcebo ayisizi ngosuku lolaka, kepha ukulunga kophula ekufeni.
Verse 5: Ukulunga kopheleleyo kuqondisa indlela yakhe, kepha omubi uyakuwa ngobubi bakhe.
Verse 6: Ukulunga kwabaqotho kuyabophula, kepha abambuluzayo babanjwa ezifisweni zabo.
Verse 7: Akwethembayo umuntu omubi kuyaphela ekufeni kwakhe, nethemba lobubi liyabhubha.
Verse 8: Olungileyo uyakhululwa osizini, kepha omubi ungena esikhundleni sakhe.
Verse 9: Ngomlomo umuntu ongenaNkulunkulu ubulala umakhelwane wakhe, kepha abalungileyo bayakhululwa ngokwazi.
Verse 10: Nxa abalungileyo behlezi kahle, umuzi uyathokoza; lapho bebhubha, kukhona ukwenanela.
Verse 11: Ngesibusiso sabaqotho umuzi uyaphakanyiswa, kepha ngomlomo wababi uyachithwa.
Verse 12: Odelela umakhelwane wakhe akanakuhlakanipha, kepha umuntu onengqondo uyazithulela.
Verse 13: Ohamba encetheza uyambula izimfihlakalo, kepha othembekile emoyeni uyayisibekela indaba.
Verse 14: Lapho kungekho iziluleko, abantu bayawa, kepha lapho kukhona abeluleki abaningi, lapho kukhona ukuphumelela.
Verse 15: Uyahlupheka nokuhlupheka omela umfokazi, kepha ozonda ukunika isibambiso ulondekile.
Verse 16: Owesifazane onomusa uzuza udumo, nezidlwangudlwangu zizuza ingcebo.
Verse 17: Umuntu onesihawu wenzela okuhle umphefumulo wakhe, kepha ononya uhlupha inyama yakhe.
Verse 18: Omubi uthola inzuzo yenkohliso, kepha ohlwanyela ukulunga unomvuzo oqinisekileyo.
Verse 19: Oqinile ekulungeni uyakuphila, kepha olandela okubi, kuyakuba ngukufa kwakhe.
Verse 20: Abanhliziyo ephambeneyo bayisinengiso kuJehova. kepha abapheleleyo endleleni yabo bayintokozo kuye.
Verse 21: Impela omubi akayekwa, kepha inzalo yabalungileyo iyakhululwa.
Verse 22: Njengendandatho yegolide empumulweni yengulube, unjalo owesifazane omuhle ongenangqondo.
Verse 23: Isifiso sabalungileyo singokuhle kuphela; ithemba lababi lilulaka.
Verse 24: Ukhona ohlakazayo; nokho uyenezelwa kakhulu; kepha ogodla kunokufaneleyo ubangelwa ukuswela kuphela.
Verse 25: Umphefumulo ophanayo uyakukhuluphaliswa; ophuzisayo uyakuphuziswa naye.
Verse 26: Ogodla amabele, abantu bayamqalekisa, kepha isibusiso siyakuba sekhanda lothengisa ngawo.
Verse 27: Ofuna okuhle ufuna okwamukelekayo, kepha ofuna okubi, kuyakumehlela.
Verse 28: Owethemba ingcebo yakhe uyakuwa, kepha abalungileyo bayakuhluma njengamaqabunga aluhlaza.
Verse 29: Okhathaza indlu yakhe uyakudla ifa lomoya, nesiwula siyakuba yinceku yonenhliziyo ehlakaniphileyo.
Verse 30: Isithelo solungileyo singumuthi wokuphila, nohlakaniphileyo uyazuza imiphefumulo.
Verse 31: Bheka, olungileyo uyavuzwa emhlabeni; kakhulu kangakanani omubi nesoni.