Verse 1: Othanda ukulaywa uthanda ukwazi; ozonda ukusolwa uyisiwula.
Verse 2: Omuhle uthola umusa kuJehova, kepha umuntu wamacebo uyamlahla.
Verse 3: Umuntu akanakuma ngobubi, kepha impande yabalungileyo ayiyikunyakaziswa.
Verse 4: Owesifazane okhutheleyo ungumqhele kuyo indoda yakhe, kepha ohlazisayo unjengokubola kwamathambo ayo.
Verse 5: Imicabango yabalungileyo ingeyokwahlulela, kepha iziluleko zababi ziyinkohliso.
Verse 6: Amazwi ababi aqamekela igazi, kepha umlomo wabaqotho uyabophula.
Verse 7: Ababi bayachithwa, bangabikho, kepha indlu yabalungileyo iyakuma.
Verse 8: Umuntu uyadunyiswa ngokokuhlakanipha kwakhe, kepha ophambene ngenhliziyo uyadelelwa.
Verse 9: Odelelwayo eyinceku udlula ozidumisayo eswele ukudla.
Verse 10: Olungileyo uyakunaka ukuphila kwesilwane sakhe, kepha isihhe sababi silunya.
Verse 11: Olima insimu yakhe uyakusutha ngokudla, kepha olandela amayiyane akanangqondo.
Verse 12: Ishinga lifisa impango yababi, kepha impande yabalungileyo iyathela.
Verse 13: Ngokuphambeka kwezindebe kukhona ugibe lomubi, kepha olungileyo uyaphuma ekuhluphekeni.
Verse 14: Umuntu uyasutha ngokuhle ngesithelo somlomo wakhe, nemisebenzi yezandla zomuntu iyabuyela kuye.
Verse 15: Indlela yesiwula ilungile emehlweni aso, kepha ohlakaniphileyo ulalela iziluleko.
Verse 16: Ukukhathazeka kwesiwula kuyaziwa ngosuku, kepha oqondileyo uyasibekela ihlazo.
Verse 17: Ophefumula iqiniso ulanda ngokulunga, kepha ufakazi wamanga ngenkohliso.
Verse 18: Bakhona abaphahluka njengokuhlaba kwenkemba, kepha izilimi zabahlakaniphileyo ziyimpiliso.
Verse 19: Indebe yeqiniso iyakuma kuze kube phakade, kepha ulimi lwamanga lungolomzuzwana nje.
Verse 20: Inkohliso isezinhliziyweni zabaceba okubi, kepha abaluleka ukuthula, kubona kukhona intokozo.
Verse 21: Olungileyo akayikwehlelwa nangokukodwa okubi, kepha ababi bayakugcwala ububi.
Verse 22: Izindebe zamanga ziyisinengiso kuJehova, kepha abenza iqiniso bayintokozo yakhe.
Verse 23: Umuntu oqondileyo uyafihla ukwazi, kepha izinhliziyo zeziwula zimemeza ubuwula.
Verse 24: Isandla sabakhutheleyo siyakubusa, kepha izidenge ziyakuphoqelwa umsebenzi.
Verse 25: Ukukhathazeka enhliziyweni yomuntu kuyayithobisa, kepha izwi elihle liyayithokozisa.
Verse 26: Olungileyo ungumholi womakhelwane wakhe, kepha indlela yababi iyabadukisa.
Verse 27: Isidenge asiyosi inyamazane yaso, kepha imfuyo enqabileyo ingeyokhutheleyo.
Verse 28: Endleleni yokulunga kukhona ukuphila, nalapho umkhondo wakho udlula khona, akukho ukufa.