Proverbs - Chapter 2

Verse 1: Ndodana yami, uma wamukela amazwi ami, uzibekelele imiyalo yami,

Verse 2: ukuze ubeke indlebe yakho ekuhlakanipheni, uthobisele ekuqondeni inhliziyo yakho,

Verse 3: yebo, uma ukhala ngengqondo, uzwakalisa izwi lakho ngokuqonda,

Verse 4: uma ukufuna njengesiliva, ukuphenya njengamagugu afihliweyo,

Verse 5: khona uyakuqonda ukumesaba uJehova, ufumane ukumazi uNkulunkulu.

Verse 6: Ngokuba uJehova uyanika ukuhlakanipha; emlonyeni wakhe kuphuma ukwazi nokuqonda.

Verse 7: Uyabekela abaqotho isibusiso, uyihawu kwabahamba bengenacala,

Verse 8: egcina izindlela zokulunga, elondoloza imikhondo yabathembekileyo bakhe.

Verse 9: Khona uyakuqonda ukulunga nokwahlulela, neqiniso, yebo, nezindlela zonke ezinhle.

Verse 10: Ngokuba ukuhlakanipha kuyakungena enhliziyweni yakho, ukwazi kube mnandi emphefumulweni wakho.

Verse 11: Amasu ayakukulinda, ukuqonda kukugcine,

Verse 12: ukuze wophulwe endleleni yobubi nakubantu abakhuluma okuphambeneyo,

Verse 13: abashiya imikhondo yobuqotho, ukuze bahambe ngezindlela zobumnyama;

Verse 14: abathokoza ngokwenza okubi, bajabulele ukuphambana kobubi;

Verse 15: abazindlela zabo ziyisigwegwe, nemikhondo yabo iphambene,

Verse 16: ukuba wophulwe kowesifazane ondindayo nakuye owezizwe onamazwi athophayo,

Verse 17: oshiya umngane wobusha bakhe, akhohlwe isivumelwano sikaNkulunkulu wakhe,

Verse 18: ngokuba indlu yakhe ishonela ekufeni, nasezithunzini izindlela zakhe.

Verse 19: Bonke abangena kuye ababuyi, bangafinyeleli ezindleleni zokuphila.

Verse 20: Kanjalo uyakuhamba ezindleleni zabahle, ugcine imikhondo yabalungileyo.

Verse 21: Ngokuba abaqotho bayakuhlala ezweni, abapheleleyo basale kulo.

Verse 22: Kepha ababi bayakunqunywa ezweni, nabambuluzayo bayakusishulwa kulo.