Verse 1: UJehova wayesemphendula uJobe esesikhwishikhwishini, ethi:
Verse 2: “Ngubani lo owenza mnyama isiluleko ngamazwi angenalwazi na?
Verse 3: Bopha izinkalo zakho njengendoda; ngizakukubuza, wena ungazise.
Verse 4: Wawukuphi, lapho ngasekela umhlaba, na? Ngitshele, uma ukwazi ukuqonda.
Verse 5: Ngubani owanquma izilinganiso zawo, ngokuba uyakwazi phela! Ngubani owelula umucu wokulinganisa phezu kwawo na?
Verse 6: Izisekelo zawo zabekwa phezu kwani na? Ngubani owabeka itshe lawo legumbi,
Verse 7: lapho izinkanyezi zokusa zahlabelela kanyekanye, nawo onke amadodana kaNkulunkulu ajabula, na?
Verse 8: “Ngubani owavalela ulwandle ngezicabha, lapha lwabhoboka kungathi lwaphuma esiswini,
Verse 9: lapho ngabeka amafu aba yisambatho salo, nesigayegaye saba yimbeleko yalo,
Verse 10: nalapho ngalumisela umncele wami, ngamisa imigoqo nezicabha,
Verse 11: ngathi: ‘Uyakufika lapha, kepha ungadluli; lapha amaza akho aziqhenyayo ayakumiswa,’ na?
Verse 12: “Emihleni yakho uyalile ukusa, wazisa umthende wokusa indawo yawo
Verse 13: ukuba ubambe amagumbi omhlaba, ababi bathintithwe kuwo, na?
Verse 14: Uguquka njengebumba lophawu lokunamathelisa; konke kuqhamuka kungathi kwembesiwe.
Verse 15: Ababi sebenqatshelwe ukukhanya kwabo, nengalo ephakemeyo yaphuliwe.
Verse 16: “Wake wangena emithonjeni yolwandle, wahamba phansi otweni, na?
Verse 17: Amasango okufa uwavulelwe, wabona amasango ethunzi lokufa, na?
Verse 18: Uqondile ububanzi bomhlaba na? Yisho, uma ukwazi konke.
Verse 19: “Iphi indlela eya lapho kuhlala khona ukukhanya, nobumnyama-ke, iphi indawo yabo,
Verse 20: ukuze ukuyise emkhawulweni wakho, uqonde imikhondo yendlu yakho, na?
Verse 21: Angithi uyakwazi, ngokuba wawusuzelwe, nomumo wemihla yakho mkhulu, na?
Verse 22: “Wake wangena ezinqolobaneni zeqhwa, wabona izinqwaba zesichotho,
Verse 23: engiziqongelele isikhathi sokuhlupheka nosuku lokulwa nolwempi, na?
Verse 24: Iphi indlela eya lapho ukukhanya kwahlukaniselwa khona, nalapho umoya wasempumalanga uhlakazekela khona emhlabeni, na?
Verse 25: Ngubani ovulele ukuchichima kwamanzi umsele nonyazi lokuduma indlela,
Verse 26: ukunisa imvula emhlabeni lapho kungekho muntu khona, nasehlane elingenamuntu,
Verse 27: ukusuthisa ihlane kwahlongasibi, nokuhlumisa uhlaza, na?
Verse 28: Kukhona uyise wemvula na? Ngubani owazala amathonsi amazolo na?
Verse 29: Iqhwa lavela esiswini sikabani, nesithwathwa sazalwa ngubani, na?
Verse 30: Amanzi ayacasha kungathi ayitshe; ubuso botwa buhlangene.
Verse 31: “Ungabopha amaketanga esiLimela, uthukulule izintambo zeMpambano, na?
Verse 32: Ungakhipha izinkanyezi ngesikhathi sazo, uhole iBhere nabantwana balo, na?
Verse 33: Uyazazi izimiso zasezulwini, umise ukumisa kwazo emhlabeni, na?
Verse 34: “Ungaphakamisela izwi lakho emafwini, ukuze amanzi amaningi akusibekele, na?
Verse 35: Ungathuma imibani ukuba ihambe, isho kuwe, ithi: ‘Bheka, silapha’?
Verse 36: Ngubani obeke ukuhlakanipha phakathi komuntu, ngubani onika ukuqonda enhliziyweni na?
Verse 37: Ngubani ongabala amafu ngokuhlakanipha, ngubani ongathulula izimvaba zasezulwini,
Verse 38: lapho uthuli luphenduka isigaxa, namagabade anamathelane, na?
Verse 39: “Uyazingelela ibhubesikazi impango, usuthise iphango lamabhongo,
Verse 40: lapho elala emihumeni yawo, ehlezi esikhundleni eqamekele, na?
Verse 41: Ngubani olungisela igwababa ukudla kwalo, lapho amaphuphu alo ekhala kuNkulunkulu, ezulazula ngokuswela ukudla, na?