Verse 1: Haleluya! Dumisani igama likaJehova; mdumiseni nina zinceku zikaJehova
Verse 2: enimi endlini kaJehova emagcekeni endlu kaNkulunkulu wethu.
Verse 3: Dumisani uJehova, ngokuba uJehova muhle; hubelani igama lakhe, ngokuba limnandi.
Verse 4: Ngokuba uJehova uzikhethele uJakobe, no-Israyeli ukuba abe yimfuyo yakhe.
Verse 5: Impela ngiyazi ukuthi uJehova mkhulu nokuthi iNkosi yethu iphezu kwabo bonke onkulunkulu.
Verse 6: Konke uJehova akuthandayo uyakwenza ezulwini nasemhlabeni, emanzini nasezinzulwini zonke.
Verse 7: Ukhuphula izinkungu emikhawulweni yomhlaba, wenza imibani kube yimvula; ukhipha umoya ezingotsheni zakhe.
Verse 8: Washaya amazibulo aseGibithe, awabantu kanye nawezilwane.
Verse 9: Wathuma izibonakaliso nezimangaliso phakathi kwakho, Gibithe, phezu kukaFaro nezinceku zakhe zonke.
Verse 10: Washaya izizwe ezinkulu, wabulala amakhosi anamandla:
Verse 11: uSihoni inkosi yama-Amori, no-Ogi inkosi yaseBashani, nemibuso yonke yaseKhanani.
Verse 12: Wanika izwe labo laba yifa, laba yifa lika-Israyeli, isizwe sakhe.
Verse 13: Jehova, igama lakho limi phakade; isikhumbuzo sakho, Jehova, sisezizukulwaneni ngezizukulwane.
Verse 14: Ngokuba uJehova uyakwahlulela abantu bakhe, ahawukele izinceku zakhe.
Verse 15: Izithombe zabezizwe ziyisiliva negolide, umsebenzi wezandla zomuntu.
Verse 16: Umlomo zinawo, kepha azikhulumi; amehlo zinawo, kodwa aziboni.
Verse 17: Izindlebe zinazo, kepha azizwa, nomoya awukho emlonyeni wazo.
Verse 18: Abazenzayo bayafana nazo, bonke abazethembayo.
Verse 19: Wena ndlu ka-Israyeli, mbonge uJehova; wena ndlu ka-Aroni, mbonge uJehova.
Verse 20: Wena ndlu kaLevi, mbonge uJehova; nina enimesabayo uJehova, mbongeni uJehova.
Verse 21: UJehova makabongwe eSiyoni, yena owakhe eJerusalema. Haleluya!